o segundo título da colección "folla de bido" é a primeira parte do intercambio poético entre dúas voces que, por camiños moi diferentes, teñen xa un lugar de relevo na poesía galega contemporánea. Son, ademais, dúas persoas moi queridas para a nosa casa.

Sara Plaza, gañadora do Premio Pérez Parallé en 2020 co vibrante todos os pasos fan ruído leva desde aquela tecendo unha voz medida, contida e fonda que viu luz de forma casual e imprevisíbel en multitude de folliñas voandeiras que chegan decote ás casas das xentes coas que se vai cruzando.

Baldo Ramos é autor dunha xa extensa obra poética que comezou con pequenas edicións de artista de poucos exemplares, que circulaban case de man en man e que comezou a consolidarse no sistema dun xeito máis forte con A árbore da cegueira, Premio de Poesía Concello de Carral en 2001. Desde aquela ten publicado máis de vinte títulos de poesía, ademais de participar en innumerábeis obras colectivas. É autor, ademais, dunha recoñecida obra plástica, tarefa que adoita fusionar coa obra literaria de diversas maneiras.

Baldo e Sara comezaron hai un tempo un frutífero intercambio poético que callou en dous libros que, como din eles mesmos nunha nota neste libro, "naceron dun mesmo impulso creativo e fan parte dun proxecto unitario que fusiona dúas diccións diferentes, aínda que moi próximas, na mesma voz".

fai clic aquí se queres botarlle un ollo ao libro